(Franciscu, un lettore di Moro Seduto, ci ha inviato questi versi in gallurese prendendo spunto dalla decisione del sindaco di Olbia di eliminare le panchine nelle piazze del centro storico di Olbia)

Noitai aemu in Tarranoa, oggj,
cos’è calche ‘ecchju è divintatu steddhu?

o la piena è turrata in Siligheddhu?
no, lu sindacu n’à bucatu li pusatoggj;

In lu malcatu, Matteotti e Malgarita

n’àni bucatu tutti li panchini in farru,

pa’ tutti li stasgjoni: ‘statiali o ‘arru,

la jenti, manni e minori, de’ stà ritta;

Ridendi si ni so in tutta la Gaddhura,
è unu schelzu di fa’ a carrasciali,
ma l’àni anticipatu a lu Natali,
de’ sta’ in pedi la passona, ‘ecchja o in ciointura;

“V’è troppa jenti spolca e piena di izi,

chi si colca in li panchini mei a tutti l’ori,

chistu è lu muttìu e chena pudori
aggju di spaltichinà chisti schivizzi”

Bedda pinsata, àni dittu chissi passoni

chi puramenti a mani o sirintina

passàni calchi ora i’ la panchina

allighendi cu l’amichi li so’ rasgioni;

Svultulendisi è lu colciu Nanni i’ la tumba,
e cun iddu Archimede e frati Manunta,

“Innuttuli è discutì d’azza e di punta,
i’ la panca, a cantu cumand’eu, no vi s’arrumba”;

“Li piazzi ‘oddu di sta’ solu di passaggiu

no mi s’àni di pianà di dimandoni
in pedi o arrumbati a li cantoni
cu borsi di la spesa e cani a traggju”;

D’ora innanzi bona jenti di suguru,

anziani, steddhi, passizzeri e viandanti

da li piazzi di cittai steti distanti
palchì nisciunu podarà puggjà lu culu.

Franciscu Natali 2024